ପିତା ସ୍ୱର୍ଗତ ନୂର୍ ଅଲୀ ଖାନ୍‌ ଏବଂ ମାତା ସୂରତୁନ୍‌ ନିଶାଙ୍କ ସୁପୁତ୍ର କବି କୁଦ୍‌ରତ୍‌ ଅଲୀ କୁଦ୍‌ରତ୍‌ଙ୍କ ଜନ୍ମ ଓଡ଼ିଶାର ଜଗତସିଂହପୁର ଜିଲ୍ଲା ଅନ୍ତର୍ଗତ ତଳପାଟକ ଗ୍ରାମରେ ୨୬ ଜାନୁଆରୀ ୧୯୫୦ ମସିହାରେ। ପୈତୃକ ନାମ କୁଦ୍‌ରତ୍‌ ଅଲୀ ଖାନ୍‌। "ଅବୁ ନଫିସା" ଛଦ୍ମନାମରେ ସେ ବର୍ଷବର୍ଷ ବ୍ୟାପି ସାହିତ୍ୟ ସାଧନାରେ ନିମଗ୍ନ। ଛାତ୍ରାବସ୍ଥାରୁ ସାହିତ୍ୟ ଓ କଳା ପ୍ରତି ତାଙ୍କର ରୁଚି ରହିଛି।

ବହୁମୁଖୀ ପ୍ରତିଭାର ଅଧିକାରୀ କୁଦ୍‌ରତ୍‌ଙ୍କ ରଚନାଶୈଳୀ ହେଉଛି ସ୍ୱତନ୍ତ୍ର। ତିନୋଟି ଭାଷା—ଉର୍ଦ୍ଦୁ, ଓଡ଼ିଆ ଓ ହିନ୍ଦୀରେ ସେ ନିଜର ଲେଖନୀ ଚାଳନା କରନ୍ତି। ସେ କେବଳ କବି ନୁହନ୍ତି, ଉପନ୍ୟାସିକ, କଥାକାର, ଅନୁବାଦକ ତଥା ସ୍ତମ୍ଭକାର ମଧ୍ୟ। ରାଜଧାନୀରୁ ପ୍ରକାଶିତ ତତ୍କାଳୀନ ଦ୍ୱିମାସିକ "ଇସ୍‌ଲାମିକ୍‌ ସମାଚାର" ପତ୍ରିକାର ସମ୍ପାଦନା ସହିତ ସମ୍ପୃକ୍ତି ସାବ୍ୟସ୍ତ କରିସାରିଛି ତାଙ୍କର ସାଂଗଠନିକ ଦକ୍ଷତାକୁ। ସରକାରୀ ଅଧିକାରୀ ପଦରୁ ଅବସର ନେଲାପରେ ବିଭିନ୍ନ ସାମାଜିକ, ଧାର୍ମିକ ତଥା ସାଂସ୍କୃତିକ ଅନୁଷ୍ଠାନ ସହିତ ସମ୍ପୃକ୍ତ ରହି ନିଜର ଦାୟିତ୍ୱ ନିର୍ବାହ କରିଚାଲିଛନ୍ତି। ନିଜର ସଫଳ ରଚନା ପାଇଁ ସେ ବିଭିନ୍ନ ଅନୁଷ୍ଠାନ ତରଫରୁ ସମ୍ବର୍ଦ୍ଧିତ, ସମ୍ମାନିତ ଓ ପୁରସ୍କୃତ ମଧ୍ୟ ହୋଇଛନ୍ତି।

ବିଭିନ୍ନ ଧାର୍ମିକ ତଥା ଶୈକ୍ଷିକ ଅନୁଷ୍ଠାନ ସହିତ ସମ୍ପୃକ୍ତି ଏବଂ ବିଭିନ୍ନ ଇସ୍‌ଲାମୀୟ ଶାସ୍ତ୍ରବିତ୍‌ମାନଙ୍କ ସାନ୍ନିଧ୍ୟ ଲାଭ କରି ସେ ଇସ୍‌ଲାମ ଧର୍ମ ସମ୍ବନ୍ଧରେ ବିଶେଷ ଜ୍ଞାନ ଅର୍ଜନ କରିବାରେ ସକ୍ଷମ ହୋଇଛନ୍ତି। କବିତା ରଚନା ବ୍ୟତୀତ ଅନେକ ଉପାଦେୟ ଇସ୍‌ଲାମିକ୍‌ ପୁସ୍ତକର ସଫଳ ଅନୁବାଦକ ଭାବରେ ତାଙ୍କର ସୁଖ୍ୟାତି ରହିଛି। ସମ୍ପ୍ରତି ପବିତ୍ରଗ୍ରନ୍ଥ କୁର୍‌ଆନ୍‌ ର ଓଡ଼ିଆ ଲିପ୍ୟନ୍ତରଣ କାର୍ଯ୍ୟରେ ସେ ଅହରହ ବ୍ୟସ୍ତ ରହିଛନ୍ତି।